This post is also available in:
English
ԵՐԵՎԱՆ, Հայաստան։ Հայաստանի ամերիկյան համալսարանի Իրավագիտության մագիստրոսական ծրագիրը Կոնցեռն Դիալոգ Փաստաբանական գրասենյակի հետ համատեղ ընդունում է դիմումներ «Կորպորատիվ իրավունքի ամառային դպրոցի» համար։ Սա եզակի հնարավորություն է՝ ստանալու ոչ միայն տեսական խորը գիտելիքներ կորպորատիվ իրավունքի վերաբերյալ, այլև ծանոթանալու իրավունքի այս բարդ և պահանջված ոլորտի գործնական կիրառմանը։
Ինչո՞ւ մասնակցել
Եռօրյա ինտենսիվ ծրագրի շրջանակում կուսումնասիրենք առևտրային կազմակերպության հիմնադրման գործնական խնդիրները և հմտությունները, առևտրային կազմակերպությունների մասնակիցների/բաժնետերերի հիմնական իրավունքները, կորպորատիվ կառավարումը, ինչպես նաև բաժնետոմսերի նկատմամբ իրավունքների գրանցումը, իրավունքների փոխանցումն ու ռեեստրավարման այլ առանձնահատկություններ։
Ինչպե՞ս դիմել
Ամառային դպրոցին մասնակցությունն անվճար է: Այն նախատեսված է իրավաբանական ֆակուլտետների բարձր կուրսերի ուսանողների և երիտասարդ մասնագետների համար։ Կորպորատիվ իրավունքի ոլորտում աշխատանքային փորձը պարտադիր չէ։ Ընտրությունը կկատարվի ներկայացված ինքնակենսագրության և մոտիվացիոն նամակի հիման վրա։
Խնդրում ենք ուղարկել Ձեր ինքնակենսագրությունը և կարճ մոտիվացիոն նամակը՝ հիմնավորելով, թե ինչու եք ցանկանում մասնակցել դպրոցին [email protected] էլեկտրոնային հասցեին մինչև հունիսի 5-ը՝ նպատակ դաշտում նշելով «Կորպորատիվ իրավունքի ամառային դպրոց»:
Դասավանդման լեզուն հայերենն է։
Ծրագրի համառոտ օրակարգը
- Օր 1. Կորպորատիվ իրավունքի հիմունքներ, առևտրային կազմակերպությունների հիմնադրում և բաժնետիրական ընկերությունների գործունեություն, բաժնետոմսերի ռեեստրավարում և առանձնահատկություններ,։
- Օր 2. Մասնակիցների և բաժնետերերի իրավունքներ (Մաս 1) հիմնական կորպորատիվ գործարքներ (ներդրումներ, բաժնետիրական և այլ համաձայնագրեր)։
- Օր 3. Կորպորատիվ կառավարում, մասնակիցների/բաժնետերերի իրավունքներ (Մաս 2)։
Բանախոսներ
- Նարինե Բեգլարյան` «Կոնցեռն Դիալոգ» փաստաբանական ընկերության ավագ գործընկեր
- Լիլիթ Կարապետյան` «Կոնցեռն Դիալոգ» ընկերության գործընկեր
- Նարինե Մելիքյան` Կորպորատիվ կառավարման կենտրոնի տնօրեն
- Արաքսյա Հարությունյան` «ԱՐՄԲՐՈԿ» ներդրումային ընկերության գլխավոր տնօրենի տեղակալ
Ամբողջական օրակարգը հասանելի է այստեղ։
Լրացուցիչ հարցերի դեպքում կարող եք կապ հաստատել մեզ հետ՝ գրելով [email protected] էլեկտրոնային հասցեին:
Հայաստանի ամերիկյան համալսարանը (ՀԱՀ) մասնավոր, անկախ համալսարան է, որը հիմնադրվել է 1991 թվականին Երևանում: ՀԱՀ-ը հավատարմագրված է ԴԲԱԸ բուհերի հանձնաժողովի (WASC Senior College and University Commission) կողմից և հանդիսանում է Կալիֆորնիայի համալսարանի համագործակիցը: Բակալավրիատի և մագիստրատուրայի կրթական ծրագրերի միջոցով ՀԱՀ-ը Հայաստանում և տարածաշրջանում տրամադրում է արևմտյան չափանիշներին համապատասխան բարձրակարգ կրթություն՝ միաժամանակ խթանելով նորարությունը և հետազոտական աշխատանք կատարելը, քաղաքացիական ներգրավվածությունը, համայնքային ծառայությունը և ժողովրդավարական արժեքները: