This post is also available in:
English
ԵՐԵՎԱՆ, Հայաստան: Հայաստանի ամերիկյան համալսարանի (ՀԱՀ) Այլընտրանքային վեճերի լուծման կլինիկան և Հայաստանի Հանրապետության Հաշտարարների պալատը ընդունում են դիմումներ «Հաշտարարությունը գործնականում» գարնանային դպրոց 2026 ծրագրի համար։
Հաշվի առնելով հաշտարարության դերի աճը՝ հատկապես որոշ քաղաքացիական գործերով պարտադիր հաշտարարության ներդրումից հետո, առկա է ապագա իրավաբանների կարողությունների զարգացման և ուսանողներին հաշտարարության իրավունքի, ընթացակարգերի և գործնական հմտությունների հետ ծանոթացնելու անհրաժեշտություն։ Միևնույն ժամանակ, ուսանողները շարունակում են որոնել գործնական, փորձառական ուսուցման հնարավորություններ, որոնք կամուրջ են հանդիսանում տեսության և պրակտիկայի միջև։
Հաշտարարության գարնանային դպրոցը ինտենսիվ կրթական և փորձառական ծրագիր է, որը համատեղում է փորձագետների կողմից իրականացվող դասընթացները, սիմուլյացիաները և մրցակցային պրակտիկան։ Այն կծառայի որպես հարթակ՝ մոտիվացված ուսանողներին բացահայտելու և նախապատրաստելու իրական հաշտարարության գործերին հետագա ներգրավման համար՝ ՀԱՀ–ի և Հաշտարարների պալատի համագործակցության շրջանակում։
Հաշտարարության գարնանային դպրոցի նպատակն է հայ ուսանողներին տրամադրել հաշտարարության հիմնարար գիտելիքներ և գործնական փորձ՝ միաժամանակ խթանելով վաղ մասնագիտական ներգրավվածությունը լիցենզավորված հաշտարարների հետ և ամրապնդելով հաշտարարության ազգային էկոհամակարգը։
Դասընթացները կապահովեն հաշտարարության համապարփակ ներածություն՝ ընդգրկելով դրա հիմնական տեսական հիմքերը և Հայաստանի Հանրապետությունում պարտադիր հաշտարարության իրավական շրջանակը։ Դրանք կհամատեղեն տեսականը և գործնականը՝ ինտերակտիվ դերային խաղեր և սիմուլյացիաներ, և կավարտվեն փորձնական քննությամբ՝ ամրապնդելու ուսումնառությունը և գնահատելու մասնակիցների գիտելիքները։
Հաշտարարության գարնանային դպրոցը կանցկացվի ՀԱՀ-ում՝ 2026 թվականի մարտի 11–14-ը։
Գարնանային դպրոցն անվճար է և բաց Հայաստանի Հանրապետության բոլոր բուհերի ուսանողների համար։
Մասնակիցների քանակը սահմանափակ է (21 մասնակից)։
Դասավանդման լեզուն հայերենն է։
Հետաքրքրված թեկնածուները կարող են դիմել հետևյալ հղումով։
Դիմումներն ընդունվում են մինչև 2026 թվականի մարտի 6-ը՝ ժամը 23:59։